„Apart Group“ იწყებს ახალ ეტაპს: ფოკუსი დეველოპმენტსა და არქიტექტურაზე

დეველოპერულ ბაზარზე ცნობილი კომპანია „Apart Group“ განვითარების ახალ ფაზაში გადადის. კომპანიის ხელმძღვანელობამ მიიღო სტრატეგიული გადაწყვეტილება, რომლის მიზანია ბიზნესის მოდელის გარდაქმნა და ფოკუსის გადატანა დეველოპერული პროექტების მენეჯმენტსა და განვითარებაზე, აგრეთვე არქიტექტურული მიმართულების გაძლიერებაზე. როგორც კომპანიაში აცხადებენ, ამ ნაბიჯით „Apart Group“ კიდევ უფრო გაამყარებს საკუთარ პოზიციას სამშენებლო და დეველოპერულ სექტორში, სადაც კონკურენცია დღითიდღე იზრდება. „ჩვენი მიზანია, ყოველი პროექტი იქცეს ხარისხისა და პასუხისმგებლობის სინონიმად. სწორედ ამიტომ გადავწყვიტეთ, სრული ენერგია მივმართოთ იმ მიმართულებებისკენ, სადაც შეგვიძლია მაქსიმალურად გამოვავლინოთ ჩვენი გამოცდილება და სტრატეგიული ხედვა, ორიენტირი ავიღოთ ახალი და ინოვაციური პროექტების შექმნასა და დეველოპმენტზე “ – აღნიშნავენ კომპანიაში. სამშენებლო პროცესის ხარისხისა და საიმედოობის უზრუნველსაყოფად, „Apart Group“-მა დაიწყო თანამშრომლობა ერთ-ერთ ყველაზე გამოცდილ სამშენებლო პარტნიორთან – კომპანიასთან „ადლი“, რომელსაც სამშენებლო სფეროში უკვე ათწლეულზე მეტი გამოცდილება აქვს. „ადლი“ ცნობილია თავისი თანამედროვე მიდგომებით, ინოვაციური ტექნოლოგიებითა და უმაღლესი ხარისხით შესრულებული სამუშაოებით. მის პორტფელში მრავალი მსხვილი, წარმატებით დასრულებული პროექტია როგორც საცხოვრებელი, ისე კომერციული მიმართულებით. ამ ეტაპზე „ადლი“ „Apart Group“-ის პარტნიორი გახდა ძველი თბილისის პროექტებზე. ეს სივრცე განსაკუთრებულ სიფრთხილესა და ზუსტ დაგეგმვას მოითხოვს – აქ ისტორიული არქიტექტურა უნდა შეერწყას თანამედროვე სტანდარტებს ისე, რომ შენარჩუნდეს ქალაქის უნიკალური იდენტობა. „Apart Group“-ის თქმით, სწორედ ამ კომპლექსურ გარემოში გამოიხატება კომპანიის გამოცდილება და პროფესიონალიზმი. „ჩვენთვის პრიორიტეტულია, რომ სამშენებლო პროცესის თითოეული ნაბიჯი იყოს წინასწარ გაწერილი და გამართული. ამისათვის გვჭირდება სანდო და კვალიფიციური სამშენებლო პარტნიორი, ხოლო ჩვენი გუნდი ფოკუსირდება ხარისხის კონტროლსა და მენეჯმენტის გამყარებაზე,“ – აცხადებენ კომპანიაში. გარდა მიმდინარე პროექტებისა, „Apart Group“ აქტიურად მუშაობს ახალ, უფრო მასშტაბურ დეველოპერულ ინიციატივებზე, რომლებიც მოიცავს როგორც თბილისს, ისე ბათუმს. კომპანიის მთავარი ამოცანა უცვლელია – პარტნიორებთან ერთად შექმნას ისეთი საცხოვრებელი და კომერციული სივრცეები, რომლებიც გამოირჩევა უმაღლესი ხარისხით და მომხმარებელზე ორიენტირებული მიდგომით. „ეს არის სტანდარტი, რომელსაც ჩვენ ჩვენს მობინადრეებსა და კლიენტებს ვპირდებით,“ – აცხადებენ „Apart Group“-ში.